Premios de Arquitectura e Rehabilitación da Comunidade Autónoma de Galicia 2020

Premio galego de arquitectura dotado con 6.000 euros: O xurado acorda galardoar co premio galego de arquitectura 2020 á Escola infantil en A Veigadaña. Arquitectos: Juan Ignacio Prieto López, Faustino Patiño Cambeiro e Estefanía Grandal Leirós. O xurado valorou o acertado do proxecto pola naturalidade coa que se insire no lugar e a capacidade de definir os seus límites físicos, nunha única operación formal, contundente, na que encontran acomodo tanto a complexa funcionalidade de todo o programa como os espazos baleiros que lle acompañan. Unha moi ben estudada sección controla os aspectos ambientais e luminosos que tanta transcendencia teñen, sobre todo nesta tipoloxía edificatoria. Complétase cunha ben resolta relación entre espazos interiores e exteriores. A precisión construtiva, coa que se manexan os materiais elixidos, está ao servizo duns espazos de sosegada ambientación, que completa a excelente calidade do conxunto, en lugar tan delicado como o bordo do Camiño de Santiago. Premio galego de rehabilitación dotado con 6.000 euros: O xurado quere comezar destacando a calidade e o número das propostas. Nunha reflexión máis ampla, desexa poñer de manifesto o carácter exemplificativo da maior parte destas actuacións e insistir na súa importancia ambiental e económica, decisivas pola súa incidencia na conservación do contorno, urbano ou rural. Neste segundo caso, coa importante derivada que supón a súa contribución a fixar a poboación ao seu contorno vital, renovando núcleos rurais que, doutro modo, camiñan velozmente cara a degradación. Decidiu, por iso, significar con idéntica valoración as tres propostas que considera máis cualificadas, valiosas e representativas deste tipo de intervencións, polo que acorda galardoar ex aequo co premio galego de rehabilitación, cunha dotación de 2.000 para cada unha, ás seguintes obras arquitectónicas: - Reconstrución de vivenda afectada pola vaga de lumes en Saa. Arquitectos: Juan José Otero Vázquez e Cecilia López Muíños. - Rehabilitación de vivenda. Arquitecto: Alfonso Penela Fernández. - Intervención en bodega e área enoturística destinada á celebración de eventos. Arquitectos: Oficina de Arquitectura, Urbanismo e Planificacion SLP. (Juan Antonio Caridad Graña e Isidro López Yañez) Reconstrución de vivenda afectada pola vaga de lumes en Saa. Valórase nesta intervención o valor da proposta que, despois do drama do incendio, aposta por volver a habitar o lugar, o que nos di moito acerca da vontade de permanencia e, ao mesmo tempo, polo que ten de significativo facelo cunha arquitectura que mira con renovada estética cara o futuro. Ten un gran valor esta conciencia de contemporaneidade, fundamentada nunha notable calidade arquitectónica sensiblemente inserida no seu contorno. E así quere resaltalo este xurado. Rehabilitación de vivenda. Aquí trátase dunha proposta situada no medio urbano, fundamentada nunha decidida vontade de renovación arquitectónica, aínda que, e de aí o valor que se quere resaltar, delicadamente sometida aos valores ambientais do contorno e a súa tradición formal. Tamén neste caso, ponse de manifesto como a calidade da súa arquitectura é capaz de resolver, adecuadamente, termos que parecen antitéticos: conservación e profunda renovación. Ambas, encontran adecuada síntese, nesta pequena intervención que, non obstante, pola súa calidade faise notar e ser merecedora do recoñecemento deste xurado. Intervención en bodega e área enoturística destinada á celebración de eventos. O xurado quere recoñecer, explicitamente, a adecuada integración paisaxística desta intervención. Os valores do contorno non so se conservan, senón que, dalgún modo veñen ser resaltados, na medida que toda a intervención se prega ao mantemento dos seus valores naturais. Escala volumétrica, elección de materialidades, concreción formal superpóñense nun notable exercicio de equilibrio e bo facer sen por iso, renunciar ás esixencias dunha complexa funcionalidade. Premio especial á sustentabilidade dotado con 6.000 euros O xurado, á vista da documentación complementaria achegada polas candidaturas propostas para a categoría de sustentabilidade, acorda galardoar co premio especial á sustentabilidade ao proxecto “Reforma de edificio existente para 8 vivendas unha oficina e aparcamento”. Arquitecto: Leonardo LLamas Álvarez. O edificio sito na r/ Colón 11 de Vigo é unha rehabilitación do antigo Hotel Galicia. O xurado considera que esta intervención constitúe un exemplo de como a calidade arquitectónica resulta perfectamente compatible coa adopción de criterios de sustentabilidade. De feito, a presente intervención supón unha aposta decidida pola sustentabilidade dende unha dobre perspectiva: Por unha banda, a decisión de partida de manter e recuperar o edificio existente, adecuándoo aos novos usos, en lugar de substituílo por unha nova edificación, implica unha utilización eficiente dos recursos e unha redución do impacto ambiental da actuación. Por outra banda, o edificio acada unha moi alta eficiencia enerxética, mediante as estratexias adoptadas de redución da demanda e eficiencia dos sistemas de produción de enerxía, que ten o seu reflexo nas cualificacións enerxéticas obtidas (ten unha cualificación enerxética coa letra A e certificado enerxético Passivhaus) Finalmente, o xurado valora moi positivamente que esta iniciativa, a prol da sustentabilidade, fora acometida por un promotor privado, pondo así de manifesto que sustentabilidade e rendibilidade económica non constitúen conceptos contrapostos.